12/12/2017

EN BRUXELAS DEFENDENDO O PATRIMONIO

Membros de Mariña Patrimonio, xunto con representantes doutras dezanove asociacións, estivemos os pasados días 6 e 7 de decembro no Parlamento Europeo informando a eurodeputados e a representantes da Comisión Europea sobre os graves danos que provoca a eucaliptización no patrimonio galego. Ademais, lembrámoslles que unha parte da celulosa que consomen en Europa é a responsable da destrución masiva do patrimonio galego, e europeo.
Nas diferentes mesas de debate mantidas no Parlamento, quedaron patentes os múltiples prexuízos que ocasiona o monocultivo do eucalipto así como o desleixo dun goberno e dunha Dirección Xeral de Patrimonio, desaparecidos na espesura do inmenso eucaliptal galaico.
Así mesmo, quedou patente o vigor dunha sociedade civil, con moitos folgos e con moitas ideas, a través das diferentes intervencións e das variadas propostas para tentar frear a devastación que a industria do eucalipto ocasiona no patrimonio natural e cultural.
Por último, queremos agradecerlles a Lidia Senra e ao seu equipo por facer posible e por ternos convidado a este interesante encontro.

12/01/2017

MARIÑA PATRIMONIO E A IRMANDADE SANTO ESTEVO DO ERMO PARTICIPARÁN NUNHAS XORNADAS NO PARLAMENTO EUROPEO SOBRE EUCALIPTOS E DESTRUCIÓN DO PATRIMONIO.

A Irmandade de Santo Estevo do Ermo e a asociación Mariña Patrimonio viaxarán a Bruxelas os vindeiros días 6 e 7 de decembro para participar no Parlamento Europeo nunhas xornadas promovidas pola eurodeputada Lidia Senra. Estas xornadas teñen como obxectivo informar e sensibilizar á Unión Europea sobre a destrución do patrimonio cultural e natural provocada pola industria do eucalipto-celulosa.
Nas actividades programadas, nas que participarán dezaoito asociacións de toda Galicia, Mariña Patrimonio xunto coa Irmandade de Santo Estevo centraranse na destrución do patrimonio cultural e arqueolóxico na Mariña. Ambas asociacións aproveitarán os encontros con representantes da Comisión Europea e as reunións con eurodeputados de diversos países, para explicarlles as nefastas prácticas forestais na produción da madeira, que abastece a industria da celulosa, así como o incumprimento das leis e das normas (europeas, estatais e galegas) por parte da industria forestal e da Xunta de Galicia.

11/19/2017

O PATRIMONIO RELIXIOSO DE CERVO NO DÍA INTERNACIONAL DO PATRIMONIO

Este sábado un nutrido grupo de persoas participamos no roteiro organizado con motivo do Día Internacional do Patrimonio, para coñecermos unha parte importante do patrimonio eclesiástico do concello de Cervo.
A xornada comezou cunha visita á igrexa de Cervo e posteriormente continuamos o percorrido polas igrexas de Sargadelos, de Rúa e de Lieiro. Así mesmo, visitamos as capelas de Santa Eufemia, en Trasbar; a de San Cibrao, no Porto de Arriba e maila de San Caetano, no Guioncho.
Dende Mariña Patrimonio queremos agradecer a colaboración do Concello de Cervo, así como a interesante achega dos guías, Antón Niñe e Carlos Miranda Trevín, e a dos propietarios das capelas visitadas, Bautista de Trasbar e Emilio Rubiños. Así mesmo, agradecemos a colaboración prestada polo párroco de Cervo e a das persoas encargadas da apertura das igrexas.
Esta interesante actividade, que nos permitiu coñecer mellor parte do rico patrimonio relixioso do concello de Cervo, desenvolveuse no marco das actividades realizadas en toda Galicia por varias asociacións integrantes da Rede do Patrimonio Cultural.

11/14/2017

Patrimonio eclesiástico do concello de Cervo

Pinturas Capela vella de Sta. Eufemia de Trasbar
 
Día Internacional do Patrimonio #DiadoPatrimonio
Roteiro polo patrimonio eclesiástico do concello de Cervo
Dende Mariña Patrimonio queremos lembrar a todas as persoas que poidan estar interesadas que o vindeiro sábado, 18 de novembro, temos programada unha visita, libre e gratuíta, polo patrimonio eclesiástico do concello de Cervo. A visita será guiada polo profesor e investigador Antón Niñe . O percorrido comezará ás 10.00h na Igrexa de Cervo e posteriormente visitaremos as Igrexas de Sargadelos, a de Rúa e maila capela vella de Sta. Eufemia de Trasbar. Despois dunha pausa para o xantar, de 14.00h a 16.00h, continuaremos co percorido coas visitas á capela de San Cibrao, no Porto, á Igrexa de Lieiro e finalmente á capela do Guioncho.
Este roteiro forma parte do conxunto de actividades programadas por diversas asociacións integrantes da Rede do Patrimonio Cultural, con motivo do Día Internacional do Patrimonio.
As persoas interesadas en participar deberán cubrir o seguinte FORMULARIO DE INSCRICIÓN

11/13/2017

Igrexa de Cervo

Día Internacional do Patrimonio #DiadoPatrimonio
18 de novembro, roteiro polo patrimonio eclesiástico do concello de Cervo.
A igrexa de Cervo é outra das que imos visitar.

11/10/2017

Igrexa de Rúa (Cervo)

Día Internacional do Patrimonio #DiadoPatrimonio
Roteiro polo patrimonio eclesiástico do concello de Cervo
A igrexa de Rúa, unha das que visitaremos no roteiro do próximo 18 de novembro


11/08/2017

Roteiro polo patrimonio eclesiástico do concello de Cervo


Co fin de conmemorar o Día Internacional do Patrimonio, Mariña Patrimonio está a organizar para o día 18 de novembro unha visita guiada, libre e gratuíta, polo patrimonio eclesiástico do concello de Cervo. O percorrido polas diferentes igrexas comezará ás 10.00h na Igrexa de Cervo e, dependendo das persoas que se inscriban, continuarase en coches particulares ou en autobús. Ás 14.00h faremos unha pausa para xantar e retomaremos a actividade ás 16.00h diante da capela de San Cibrao no Porto.

Quen o desexe poderá participar no xantar que terá lugar no restaurante O Pedregal de San Cibrao; a data límite para anotarse é o martes 14 (prezo 12€)

Este roteiro enmárcase no conxunto de actividades programadas por diversas asociacións integrantes da Rede do Patrimonio Cultural.

As persoas interesadas en participar deberán cubrir o seguinte FORMULARIO DE INSCRICIÓN

9/25/2017

Roteiro A Coruña

Aquí podedes ver algunhas fotos do roteiro que fixemos pola cidade de A Coruña. Unha xornada moi agradable e proveitosa en compañía de Ana Isabel Filgueiras, a quen lle agradecemos novamente a súa colaboración.

9/07/2017

ROTEIRO URBANO POLA CORUÑA

SÁBADO, 23 DE SETEMBRO 
En Mariña Patrimonio estamos a organizar un interesante roteiro pola cidade da Coruña. Convidámosvos a participar connosco nesta nova actividade.
Horario
7:30 - Saída do autobús dende Foz con paradas en Burela, Cervo, San Cibrao, Xove e Viveiro (os horarios intermedios avisaranse previamente)
10:00 - Visita á exposición sobre o castro de Chao Samartín e exposición permanente no castelo de San Antón.
12:00 - Visita guiada ao castro de Elviña.
14:00 - Xantar en restaurante reservado para o grupo.
16:00 - Ruta urbana para coñecer as raíces históricas da Coruña, incluíndo os muíños de vento, sobre os que é especialista a arqueóloga que nos guía.
19:00 - Saída da Coruña e volta á Mariña.
Límite de prazas (39)
As solicitudes serán atendidas por orde de inscrición. Para solicitalas, haberá que cumprimentar este  formulario.
Cando estean cubertas todas, avisarase por correo electrónico aos inscritos aceptados para formalizar o pago previo.
Tamén se lles comunicará a non inscrición aos que non poidamos atender.
Prezos, incluído seguro de responsabilidade civil
Custe da actividade:  socios e nenos: 20 € - non socios: 30 €
Xantar: 20 €
Data límite para solicitar a inscrición (sen pagar): día 11 de setembro
(os que sexan notificados como inscritos deberán ingresar o custe da actividade antes do 16 de setembro. O resto dos solicitantes quedará en lista de espera por se xorde algunha baixa)
O pagamento deberá realizarse na seguinte conta bancaria:
Mariña Patrimonio,  ABANCA, IBAN ES84 2080 0160 4830 4000 7104
(debe enviarse por correo electrónico a copia do ingreso)

8/08/2017

A Xunta prohíbe varar embarcacións no círculo lítico da Roda de Barreiros, que está a 1 km da costa

Non se permite o varado de embarcacións fóra dos puntos establecidos”, así reza o panel informativo, asinado pola Xunta de Galicia, colocado no emblemático xacemento do concello de Barreiros (Lugo)
Para quen non coñeza o sitio arqueolóxico da Roda de Barreiros (Lugo), cómpre dicir que se atopa no concello de Barreiros, a un quilómetro da costa e a varios quilómetros de calquera curso fluvial navegable. En 2006 o xacemento foi obxecto dunha escavación arqueolóxica debido a que os antigos moradores desta zona, hai uns 3700 anos, decidiron construír esta enigmática estrutura circular xusto no trazado da autovía A8. A Roda foi totalmente escavada e, lonxe de aportar luz, suscitou máis dúbidas sobre que tipo de xacemento é esta estrutura circular.
Dende 2006 a Roda de Barreiros, malia as promesas da Consellería de Cultura de poñela en valor, caeu no máis absoluto dos abandonos: o xacemento sen protexer, as catas abertas e os eucaliptos, eses que non son invasores, invadindo desaforadamente todo o xacemento. Esta situación ten sido denunciada por Mariña Patrimonio en reiteradas ocasións.
En 2015, por fin, Patrimonio decide intervir e realiza novas catas no xacemento o que lles permite datalo na Idade do Bronce. Trataríase dunha estrutura tipo Henge que, segundo os arqueólogos, a convertiría no único coñecido na Europa continental. Con estes novos datos reaparecen as promesas de posta en valor e en 2016 o Concello de Barreiros coloca na estrada nacional un indicador do lugar ilegalmente, polo que foi retirado ás poucas horas por Fomento. Até o momento, a outra gran posta en valor do sitio arqueolóxico consistiu en colocar un panel informativo que, entre outros, asina a Xunta de Galicia. 


Supoñemos que para destacar o gran valor do xacemento cumpría un gran panel; non abondaba colocar un discreto como os que se adoitan ver nos sitios arqueolóxicos normais, aquí o panel “grande, ande ou non ande”; por suposto colocado no lugar que máis interfira na visión do xacemento. De todas maneiras, se non deixa ver A Roda non importa, xa que o panel repite ata en tres ocasións a mesma fotografía do xacemento, que o poderiamos ver ao natural, se o propio panel e os toxos o permitisen.


Sobre o texto do mencionado panel xa non imos entrar, aínda que sen dúbida debería ter pasado o filtro dalgún entendido en lingua e en arqueoloxía.
Para rematar, e emulando os contratos das entidades bancarias, o panel da Roda de Barreiros tamén ten a súa letra pequena; de feito, na parte inferior esquerda atopamos un recadro que, entre outras exquisiteces, advirte que “non se permite o varado de embarcacións fóra dos puntos establecidos”.



7/10/2017

UNHA PLANTACIÓN DE EUCALIPTOS PROVOCA POSIBLES DANOS NUN CASTRO DE A PONTENOVA

ADEGA e Mariña Patrimonio vimos de presentar unha denuncia perante o Servizo de Patrimonio polos posibles danos ocasionados por labores forestais no castro de O Patelo (GA27048002), ubicado en Santo Estevo de Rececende, concello de A Pontenova (Lugo). Ambas asociacións cren que a apertura de pistas, xunto cos aterrazamentos e mailas remocións de terras no xacemento, así como na zona de protección, puideron afectar este ben patrimonial.
Débese ter en conta que este sitio arqueolóxico está catalogado pola Dirección Xeral de Patrimonio e figura nas normas subsidiarias do concello de A Pontenova, o que o converte nun ben patrimonial protexido.
O castro de O Patelo estaba cuberto por unha frondosa carballeira e, lamentablemente, este bosque autóctono foi cortado e substiuído, posiblemente de forma ilegal, por unha plantación de eucaliptos.
Por outro lado, ADEGA e Mariña Patrimonio sabemos que o Servizo de Patrimonio facilitoulle a Medio Rural información sobre os xacementos arqueolóxicos da zona norte da provincia de Lugo, mais trece dos vinte e tres xacementos que a Xunta inventariou no concello de A Pontenova non teñen as coordenadas, polo tanto non están localizados pola administración o que conleva a súa desprotección. Esta ausencia de coordenadas é unha mostra máis da incapacidade e da falla de vontade por parte da Dirección Xeral de Patrimonio para solucionar un problema que cómpre atallar canto antes para evitar a desaparición masiva do noso patrimonio arqueolóxico a mans da industria do eucalipto.

6/27/2017

RUTA FRAGA DAS VIGAS

Sábado, 8 de xullo de 2017


RUTA POLA FRAGA DAS VIGAS

 Fraga Vella (Alfoz-Abadín) (ver mapa)


Ruta de dificultade baixa (8-10 km ida e volta) que descorre por unha fraga na cabeceira do Río Figueiras (afluente do Masma)

Hora e punto de encontro:  10:30 h. no restaurante O Frenazo (ver mapa) 

A volta prevese para media tarde (cómpre levar bocadillo e bebida para xantar en ruta)

Prezos (inclúen seguro): 
   - Socios: 6 €
   - Non socios: 10 €

Forma de pago: Ingreso en conta ou transferencia. Concepto: Ruta das Vigas e nomes dos participantes. Nº CONTA: ES84 2080 0160 4830 4000 7104
(Obrigatorio cubrir o formulario e remitir xustificante de pago a este enderezo electrónico mr.patrimonio@gmail.com antes do mércores 5 de xullo)

Para inscribirse pulsar  AQUÍ

Organiza: MARIÑA PATRIMONIO

6/04/2017

O tecido asociativo de Galicia crea a Rede do Patrimonio Cultural

 Foto: Sole Felloza.
                            
Máis de cincuenta asociacións participan nesta iniciativa para vertebrar a defensa e promoción do noso patrimonio material e inmaterial

A cultura é a identidade do noso pobo”. Con esta premisa, máis de cincuenta entidades culturais e patrimoniais de toda Galicia abriron o proceso para a creación da Rede polo Patrimonio Cultural Galego, unha entidade cuxo principal obxectivo será velar pola protección, a divulgación e a defensa do patrimonio cultural do país. 33 delas estiveron presentes na xuntanza fundacional da Rede no museo do Pobo Galego este sábado 3 de xuño. Nas vindeiras semanas, as asociacións que refrenden os acordos tomados constituirán xa formalmente esta Rede de Patrimonio Cultural.

A rede servirá coma un instrumento de axuda e unha ferramenta de difusión das actividades de todas as asociacións e entidades que participan dela e tamén para promover accións e campañas en defensa do noso patrimonio cultural en ámbitos institucionais, sociais e territoriais aos que a cada unha destas entidades, por si soas, lles resulta difícil acceder.

54 entidades de gran diversidade territorial e sectorial

54 entidades de todo o país, que reúnen desde grupos culturais de carácter local ou comarcal, grupos de investigación universitarios e asociacións de carácter profesional uníronse no que é a primeira rede vinculada ao patrimonio cultural que se crea en Galicia, un país onde a cultura e o patrimonio constitúe unha importante fonte de riqueza tanto social como económica e un valioso activo cara o futuro. As entidades participantes na rede manterán a súa independencia, aínda que participarán do seu calendario común de actividades.

Unha planificación anual

A Rede polo Patrimonio Cultural Galego realizará campañas –dúas ou tres por ano--, que afecten a aspectos económicos, lexislativos, administrativos, sociais ou educativos relativos ao patrimonio cultural, á súa conservación, protección e promoción. Ademais, as entidades participantes acordaron impulsar mecanismos e compartir recursos para divulgar o patrimonio, especialmente na ensinanza, co obxectivo de que os máis pequenos crezan cos valores do amor a súa historia e a súa cultura.

Por outra banda, consciente de que forma parte dun espazo cultural e histórico concreto, a rede tamén apoiará campañas que non só se subscriban á Galicia territorial, senón tamén campañas que abrangan outros espazos, coma o norte de Portugal ou as zonas fronteirizas de Asturias e de Castela e León. Neste senso, dará apoio a iniciativas como a de Ponte das Ondas.

A Rede polo Patrimonio Cultural Galego conta xa coa web redepatrimonio.gal para difundir as súas actividades e a de todas as entidades participantes e creará unha intranet para as comunicacións internas.

A creación desta nova entidade de defensa do patrimonnio é froito de semanas de contactos entre distintas entidades. Máis de 50 de toda Galicia amosaron o seu interese en participar nela e 33 ratificaron os acordos para impulsala nunha xuntanza que tivo lugar este sábado no Museo do Pobo Galego, en Santiago.

As entidades que participan no proceso de fundación da Rede de Patrimonio Cultural son:

A Gentalha do Pichel
A. C. Arrincadeira
A. C. Cultura do País
ADEGA
Alén Nós
Amigos do Arqueolóxico
Asoc. Cultural Festa da Prehistoria
Asociación ABERTAL del Eo-Navia
Asociación ambiental e cultural Petón do Lobo
Asociación Amigos do Patrimonio de Castro Verde
Asociación Amigos dos Castros
Asociación Betula
Asociación Cultural e Pedagóxica Ponte...nas ondas!
Asociación Cultural O Bión
Asociación Cultural Pereira Adiante
Asociación cultural Sonora
Asociación de Amigos do Parque do Pasatempo
Asociación de Veciños O Chedeiro
Asociación galega Cova Crea
Asociación Galega do Xogo Popular e Tradicional
Asociación Monte Pindo Parque Natural
Asociación Nordés
Asociación para a defensa do Patrimonio Cultural Galego
Asociación profesional CRG da Conservación e Restauración de bens culturais de Galicia
Asociación profesional de guías de turismo de Galicia
Asociación Xermolos
Buxa, Asociación Galega do Patrimonio Industrial
Colectivo A Rula
Colectivo defensa Patrimonio A Forneiriña
Colectivo defensa territorio ANOVATERRA
Colectivo Patrimonio dos Ancares
Comunidade de Montes de Baroña
Etnoga Patrimonio Cultural, SL
Formas Cip Sl
Fundación Alexandre Bóveda
Fundacion Eira
Fundación Galicia Sustentable
Fundación Terra Termarum Castrolandín
Grupo de Investigación "A Laxe da Irena"
Grupo de Investigación Roda
Irmandade Augas Santas
Irmandade Illa de Tambo
Irmandade Santo Estevo
Liga Céltica Galaica
Mariña Patrimonio
Monterrei Cultura e Territorio e Plataforma en Defensa do Castelo de Monterrei
Noutrora
O Colado do Vento
O Sorriso de Daniel
O Suído
Patrimonio dos Ancares
patrimoniogalego.net
Phottic
Plataforma pola recuperación do Sar
Proxecto Socheo
Roxí Roxal
Seminario de Estudos Comarcais da Costa da Morte
Sociedade Antropolóxica Galega (SAGA)
Sociedade Histórica e Cultural Coluna Sanfins
Sos Arte Rupestre
Umia Vivo
www.historiadegalicia.gal





































             Foto: Sole Felloza.

5/30/2017

Rede do património cultural

O vindeiro sábado 3 de xuño as asociacións e colectivos en defensa do patrimonio temos unha cita no Museo do Pobo Galego para botar a andar a Rede do Patrimonio Cultural. Mariña Patrimonio considera que esta rede é unha ferramenta moi útil para avanzar con maior eficacia na protección do noso patrimonio cultural.
Se queredes participar, podedes inscribirvos no formulario que está ao final da declaración, ou clickando aquí.

DECLARACIÓN CONXUNTA PARA UNHA COORDINACIÓN DAS ENTIDADES POLA DEFENSA DO PATRIMONIO CULTURAL GALEGO
  1. O territorio galego concentra unha inxente cantidade de bens culturais materiais e inmateriais. Son o legado da intensa ocupación e uso do territorio por comunidades humanas desde o principio dos tempos e a testemuña viva e real das bases da cultura e identidade do noso país, herdanza que queremos preservar.
  2. Este legado constitúe, na actualidade, unha enorme fonte de riqueza de moitos tipos: humana, social, cultural e económica. Xunto á súa preservación como deber por parte das xeracións que se consideran herdeiras dese legado para o futuro, a súa dinamización abre novas oportunidades á nosa sociedade en numerosos ámbitos, constituíndose como unha das fontes de riqueza do país con máis posibilidades e, ao mesmo tempo, máis sustentable no noso territorio.
  3. En Galicia existen numerosos movementos culturais cidadáns que exercen unha constante actividade, de base local ou comarcal de defensa do devandito patrimonio, tamén da súa dinamización, cunha grande eficacia no control e vixilancia da contorna inmediata. Os resultados, moi loados nas súas áreas de acción, non sempre trascenden nin son abondo visibles a nivel galego.
  4. Porén,  aínda que os danos ao patrimonio sempre son locais (a un ben concreto nun momento concreto) tanto a lexislación como as políticas de patrimonio cultural ou as grandes problemáticas (sector forestal, grandes infraestruturas públicas, marco xurídico) trascenden ese ámbito e condicionan, xa que logo, a capacidade de actuación de moitas  entidades locais. É preciso dotalas dun  instrumento que lles permita operar naqueles ámbitos administrativos (comunidade autónoma, Estado, Unión Europea) que son de difícil acceso para unha pequena entidade e na que esta pode exercer un papel pouco representativo.
  5. Na actualidade vólvese vivir un interese por parte de persoas e grupos da sociedade civil por coidar o patrimonio cultural, participar activamente na súa preservación e xestión. Non hai dúbida de que o papel de Internet, conectando a individuos antes illados en diferentes lugares e compartindo información, problemáticas e solucións, incentiva este novo activismo. Internet adáptase con facilidade ás estruturas asociativas galegas, horizontais, descentralizadas e sen unha xerarquía sólida.
  6. Os escasos orzamentos que destinan as Administracións ao patrimonio cultural, as profundas transformacións da sociedade e das economías rurais e os cambios lexislativos promovidos recentemente  pola Administración galega están a afectar de xeito crítico ao noso patrimonio cultural. É o momento de dar un paso que permita enfrontar estes novos desafíos, sempre desde o respecto á idiosincrasia das entidades locais e comarcais do país.
  7. Proponse una ferramenta conxunta de coordinación das asociacións locais/comarcais e outras de ámbito galego (que tamén asinan) , todas elas de defensa do patrimonio  para se dirixir ás autoridades, organismos ou entidades pertinentes en prol da salvagarda do noso patrimonio cultural.
  8. As entidades que asinan este documento comprométense a crear sistemas de comunicación horizontal, de libre adhesión, sen xerarquías, aos que se poidan incorporar outras organizacións co fin de adhesión aos termos nos que se redacta o presente documento.
  9. A mecánica de traballo inicial será o traballo conxunto e a elaboración de iniciativas decididas pola rede que teñan un claro fin de defensa e/ou posta en valor do patrimonio cultural e que pola súa natureza ou dimensión precisen dunha escala superior á de cada unha das entidades. Ningunha organización poderá actuar en nome da Rede e nos casos que se acade unanimidade nomearase unha representación e aclarando en toda a documentación que entidades forman parte dunha iniciativa concreta.
  10. As organizacións que asinan esta Declaración manteñen a súa independencia e autonomía e comprométense a encetar o camiño cara a creación dunha estrutura de coordinación de entidades do patrimonio.

5/26/2017

ARRASAN UN DOLMEN E LEVAN UNHA DAS SÚAS LAXES PARA ADORNAR UN XARDÍN

O espolio produciuse no transcurso dunha corta e plantación de eucaliptos no concello de O Valadouro.
 
ADEGA e Mariña Patrimonio presentamos o pasado 9 de maio unha denuncia perante o Servizo de Patrimonio Cultural, despois de termos noticia da destrución do dolmen da Casa dos Mouros de Lobeira (Budián, O Valadouro- Lugo) no transcurso duns labores forestais.
Segundo a información achegada por diferentes fontes, supostamente os responsables dos danos infrinxidos na Casa dos Mouros terían incumprido os requisitos de patrimonio para a corta e plantación dos eucaliptos no dolmen e na súa zona de protección.
Probablemente os espoliadores aproveitaron as pas mecánicas e a maquinaria pesada, utilizadas na realización dos labores forestais, para extraeren dous esteos do dolmen e para trasladar un deles a un xardín situado nunha casa no concello de Foz, onde foi localizado polo SEPRONA.
O outro esteo deixárono abandonado á beira da mámoa porque lles partiu cando o sacaron do túmulo.

Lamentablemente, ademais deste espolio, o túmulo foi totalmente furado coas pas mecánicas o que acabou provocando aínda máis danos no xacemento.
Sábese que o dolmen da Casa dos Mouros é un xacemento sobradamente coñecido polos veciños do lugar, pero ademais existe bibliografía sobre el e mesmo podemos atopar información na páxina oficial do Concello de O Valadouro, así como noutros sitios da Internet.

A masiva destrución do patrimonio, provocada pola industria do eucalipto, é un grave problema que a Consellería de Cultura non quere afrontar, sexa por submisión á todopoderosa industria forestal ou simplemente por falta de capacidade.

Dáse a circunstancia de que hai exactamente un ano denunciamos os danos ocasionados polos eucaliptos no outro túmulo existente na Lobeira. A día de hoxe non temos constancia de que a Consellería de Cultura teña actuado para esclarecer os feitos denunciados. Sexa por incompetencia ou por submisión, a Consellería está enviando unha mensaxe clara: a destrución do patrimonio non ten consecuencias para quen o destrúe.

Por último, ADEGA e Mariña Patrimonio queremos darlle os parabéns ao Servizo de Protección da Natureza da Garda Civil pola súa rápida e eficaz actuación, xa que grazas ao seu labor localizáronse os restos espoliados e foron identificados os posibles responsables dos danos e do espolio da Casa dos Mouros de Lobeira.

5/21/2017

IMOS DE EXCURSIÓN A RIOTORTO, A PONTENOVA E A VILADONGA

O sábado, 27 de maio, imos de excursión, pararemos na mina de ouro romana d'A Muxueira (Riotorto) , de seguido desprazarémonos a Sanxés (A Pontenova) para andar pola ruta da Seimeira, xantaremos na Taberna de Montse, e pola tarde visitaremos o museo e o castro de Viladonga, para rematar no de Sa.

Para informarte, reservar e anotarte preme aquí.

5/13/2017

CHARLA SOBRE A TURBEIRA DE SAN MIGUEL DE REINANTE

O próximo sábado día 20 nos Colexios Vellos de San Miguel de Reinante (Barreiros), Aurora Grandal falaranos sobre a turbeira da praia de Arealonga así como dos restos óseos de fauna que nos últimos anos foron aparecendo nesta turbeira.




5/08/2017

NOVA DESFEITA DA INDUSTRIA DO EUCALIPTO NO CASTRO DA RILLEIRA

 
  O pasado 24 de abril ADEGA e Mariña Patrimonio presentamos unha nova denuncia por mor dos posibles danos ocasionados no xacemento arqueolóxico do castro da Rilleira (Cabarcos- Barreiros. Lugo) tras a realización duns traballos forestais. Unha vez máis vemos como a industria do eucalipto actúa con total impunidade e con absoluto desprezo polo noso patrimonio ao danar un xacemento arqueolóxico catalogado e protexido. Unha vez máis vemos a total desconexión entre Medio Rural, Patrimonio e a industria forestal e unha vez máis veremos o desleixo por parte da Xunta de Galicia que, despois desta denuncia, novamente comezará a buscar escusas para non actuar en contra da todopoderosa industria do eucalipto.

A destrución e os danos repítense. Hai exactamente un ano, denunciamos a desfeita provocada pola plantación de eucaliptos noutra parcela deste mesmo castro sen que a día de hoxe, malia o tempo transcorrido, teñamos recibido ningunha resposta por parte da Dirección Xeral de Patrimonio Cultural da Xunta. Desta volta, os labores forestais afectaron gravemente a croa, os foxos, o parapeto e maila muralla pétrea, deixando á vista en toda a superficie abundantes restos arqueolóxicos. Empregouse maquinaria pesada, deuse apertura a unha pista que cortou o parapeto, arrincáronse as raíces dos vellos eucaliptos e realizáronse novos furados con pá mecánica para plantar os novos.

Para algúns investigadores, o castro da Rilleira, situado no val de Cabarcos, tería unha grande significación histórica, xa que sería o lugar onde se asentaban os cibarcos, unha tribo galaica da que nos fala o historiador romano Plinio o Vello. Este castro conta cun impresionante sistema defensivo formado por tres foxos picados na rocha e, probablemente, a croa contase cunha muralla pétrea de módulos

Dende ADEGA e Mariña Patrimonio preguntámonos cando decidirá a Dirección Xeral de Patrimonio asumir o seu deber de protexer o noso Patrimonio e cando comezará a actuar en contra dunha industria forestal irresponsable que, por uns centos de eucaliptos, é capaz de destruír un importante ben cultural.